Drejtori i Përgjithshëm i Policisë së Shtetit, Ilir Proda, priti në një takim zyrtar Ministrin-Këshilltar të Ambasadës Kineze në Shqipëri, Huang Xuehu.
Takimi, i zhvilluar në ambientet e DPPSh-së, u fokusua në forcimin e bashkëpunimit dypalësh, përmes një marrëveshjeje të re dhe ngritjes së një pike kontakti të Policisë kineze pranë Policisë së Shtetit.
Të dy palët u dakordësuan se këto hapa do të shërbejnë për të luftuar në mënyrë më efektive krimin e organizuar ndërkombëtar.
Gjatë takimit u diskutua edhe për operacionet e fundit të Policisë së Shtetit kundër shfrytëzimit për prostitucion, ku janë përfshirë shtetase kineze. Zyrtarët theksuan rëndësinë e qasjes së koordinuar institucionale për ndjekjen e autorëve dhe mbrojtjen e viktimave.
Proda vuri në dukje nevojën për rritjen e shkëmbimit të informacionit dhe bashkëpunimit ndërkombëtar, ndërsa përfaqësuesi kinez shprehu angazhimin për intensifikimin e marrëdhënieve në fushën e sigurisë.
