Mbrëmja e 12 gushtit ka qenë një natë tmerri për banorët e Delvinës, ku flakët u afruan rrezikshëm pranë qytetit. Falë ndërhyrjes së zjarrfikësve nga bashkitë e jugut, forcave të ushtrisë dhe banorëve, u bë e mundur frenimi i zjarrit pranë zonave të banuara, ndërsa vatrat aktive vijojnë në Kakodhiq.
Rreth 10 persona kërkuan ndihmë mjekësore për shkak të asfiksisë, mes tyre edhe 4 ushtarë që ndihmonin në shuarjen e zjarrit.
Spitali i qytetit u zhvendos përkohësisht në ambientet e Kinoteatrit, ndërsa pati evakuim të banorëve dhe ndërprerje të energjisë elektrike.
Zjarri, që nisi në Finiq, kaloi në territorin e Delvinës, duke rrezikuar edhe puset e naftës. Situata vijon të jetë kritike dhe kërkohet ndërhyrje nga ajri.
