Një burrë 87-vjeçar nga Velletri ka ndërruar jetë në Institutin Kombëtar “Lazzaro Spallanzani” në Romë si pasojë e infektimit me virusin e Nilit Perëndimor, duke e çuar në 10 numrin e viktimave në rajonin Lazio për vitin 2025.
Pacienti, që vuante edhe nga sëmundje bashkëshoqëruese, ishte shtruar më 4 gusht në spitalin civil “Paolo Colombo” në Velletri dhe u transferua në Spallanzani më 10 gusht, ku nuk mundi të mbijetonte.
Sipas autoriteteve shëndetësore, në Lazio janë konfirmuar 17 raste të reja të infektimit që nga përditësimi i fundit, duke e çuar totalin e rasteve pozitive në 153.
Shumica e rasteve janë regjistruar në provincën e Latinës, por infeksioni është përhapur edhe në zona të tjera si Roma dhe Frosinone.
Aktualisht, 26 pacientë ndodhen të shtruar në spitale, 5 në terapi intensive, 84 janë në gjendje të mirë në shtëpi, dhe 28 janë larguar nga spitali pas trajtimit.
