I rikthyer nga pushimet Sali Berisha ka kritikuar ashpër qeverinë për përballimin e situatës me zjarret në vend, duke e cilësuar vitin 2025 si më të rëndin për dëmet në banesa dhe bagëti.
Sipas tij, qeveria ka dështuar të mbrojë qytetarët dhe pasuritë e tyre, ndërsa akuzoi kryeministrin Rama për mungesë reagimi.
Berisha kërkoi më shumë mjete dhe investime për emergjencat, duke përmendur se me vetëm një pjesë të fondeve publike, mund të ishin siguruar avionë dhe helikopterë për shuarjen e zjarreve.
Megjithatë, të dhënat zyrtare tregojnë një tjetër realitet.
Sipas Copernicus, Shqipëria ka regjistruar 54 mijë hektarë të djegura deri në 15 gusht, duke u renditur pas Portugalisë, Spanjës, Turqisë dhe Italisë.
Sa i përket viktimave, Shqipëria ka shënuar vetëm një rast, i cili rezultoi të ishte vetë autori i zjarrit në Gramsh.
Qeveria ka nisur procesin e vlerësimit të dëmeve dhe përgatit dëmshpërblimet për qytetarët e prekur, por për Berishën kjo është “propagandë”.
Ndërkohë, situata në vend, sipas autoriteteve, po shkon drejt normalizimit.
