Presidentja e Bankës Qendrore Evropiane, Christine Lagarde, deklaroi sot se ekonomia e eurozonës, pas një rritjeje të fortë në tremujorin e parë të vitit 2025, po tregon tashmë shenja ngadalësimi në tremujorin e dytë, ndikim që pritet të thellohet më tej për shkak të tarifave të reja me SHBA-në.
“Marrëveshja me Uashingtonin parashikon tarifa mesatare efektive prej 12 deri në 16% mbi eksportet evropiane, më të larta se parashikimet tona të qershorit”, u shpreh Lagarde.
Ajo theksoi se efektet pozitive të përkohshme, si përshpejtimi i eksporteve drejt SHBA-së në pritje të tarifave, tani janë zbehur.
Edhe pse këto tarifa janë më të ulëta se skenari i rëndë i mëparshëm me mbi 20%, BQE-ja mbetet e kujdesshme për shkak të pasigurive që lidhen me sektorët e farmaceutikës dhe teknologjisë.
“Evropa duhet të diversifikojë partneritetet tregtare përtej SHBA-së dhe të shfrytëzojë potencialin e saj eksportues”, përfundoi ajo gjatë Forumit Ekonomik Botëror.
