Sekretari i Përgjithshëm i Partisë së Lirisë, Tedi Blushi deklaroi sot se Avokati i Popullit faktoi shkeljen e ligjit nga SPAK e Policia për rrëmbimin e Ilir Metës.
“Policia zhduku provat, SPAK nxorri urdhër të paligjshëm” nënvizoi Blushi duke kërkuar hetim të pavarur ndërkombëtar mbi mënyrën kriminale të arrestimit dhe përgjegjësit e këtij rrëmbimi politik.
“Partia e Lirisë kërkon me vendosmëri:
Ndërhyrje urgjente të Gjykatës Kushtetuese, për të konstatuar shkeljet flagrante të të drejtave themelore të qytetarit Ilir Meta dhe për të rikthyer ligjshmërinë në vend duke i dhënë fund masës absurde, kriminale dhe politike të arrestit me burg për Presidentin e Partisë së Lirisë;
Një hetim të pavarur ndërkombëtar mbi mënyrën kriminale të arrestimit dhe përgjegjësit e këtij rrëmbimi politik;
Reagim të menjëhershëm të institucioneve ndërkombëtare të mbrojtjes së lirive dhe të drejtave të Njeriut, veçanërisht të Këshillit të Europës dhe Bashkimit Evropian, të Komisionit kundër Torturës, për këtë precedent të rrezikshëm për demokracinë në Shqipëri” tha ai.
