Një skenë që dukej e përgatitur për një audiencë ndërkombëtare u zhvillua në Kinën lindore ku udhëheqësit e Kinës, Rusisë dhe Indisë u shfaqën duke buzëqeshur, me shtrëngime duarsh të forta dhe deklarata miqësie në samitin e Organizatës së Bashkëpunimit të Shangait.
Kryeministri indian Narendra Modi eci përkrah Vladimir Putinit duke shkëmbyer shtrëngime duarsh të përzemërta përpara se të takohej me Xi Jinping.
Të tre udhëheqësit formuan një rreth, me Putinin që buzëqeshi gjerësisht dhe Modin që shpërtheu në të qeshura, dhe në një moment ata i shtrënguan duart, një imazh që ringjalli idenë e një “trojke ” Pekin-Moskë-Nju Delhi.
Analistët vërejnë se shfaqja publike e kohezionit dërgon një mesazh të një rendi botëror alternativ drejt Shteteve të Bashkuara, në një kohë kur administrata Trump ka prishur ekuilibrin me tarifa tregtare dhe sanksione.
Modi, i cili u shënjestrua nga Uashingtoni për blerjen e naftës ruse donte të tregonte se India ka aleatë të tjerë strategjikë.
Në fjalimet e tyre, Xi u bëri thirrje anëtarëve të kundërshtojnë “mentalitetin e Luftës së Ftohtë” dhe “blloqet konfrontuese”, ndërsa Putin përsëriti kritikat e tij ndaj Perëndimit në luftën e Ukrainës dhe theksoi se ai e kishte informuar tashmë Xi-në për bisedimet e tij me Presidentin Trump në Alaska.
Modi, nga ana e tij, foli për një “rend global shumëpalësh dhe gjithëpërfshirës”, duke pretenduar një rol më të madh për Indinë.
