Në parlamentin francez zhvillohet seanca e votëbesimit të qeverisë së François Bayrou. Deputetët pritet të votojnë rreth orës 19:00 të mbrëmjes për t’i dhënë ose jo besimin Bayrou-t.
Kryeministri i Francës, François Bayrou gjatë fjalimit në Asamblenë Kombëtare u shpreh se shumë prej kritikëve të tij e kanë konsideruar si të rrezikshme kërkesën për votëbesim.
“Rreziku më i madh do të ishte të mos marrim asnjë rrezik, të lëmë gjithçka të vazhdojë siç është,” deklaroi ai.
Bayrou nënvizoi se deputetët nuk përballen me një zgjedhje të thjeshtë politike, por me një përgjegjësi historike që do të përcaktojë të ardhmen e Francës. Gjithashtu ai renditi një sërë çështjesh kritike që kërkojnë zgjidhje.
