Sekretari amerikan i Shtetit, Marco Rubio për hyrjen e dronëve rusë në territorin e Polonisë, i cilësoi si të papranueshme, të trishtueshme dhe të rrezikshme.
“Çështja është nëse dronët kishin një objektiv të caktuar duke hyrë në Poloni. Nëse kjo rezulton e vërtetë, atëherë kemi të bëjmë me një përshkallëzim serioz”, u shpreh Rubio për gazetarët gjatë nisjes së tij për në Britani dhe Izrael.
Ai shtoi gjithashtu se do të duhen edhe disa ditë për të mësuar më shumë rreth incidentit.
“Ekzistojnë disa mundësi të tjera, por mendoj se duam të kemi prova të qarta dhe të konsultohemi me aleatët tanë përpara se të nxjerrim përfundime të caktuara”, tha ai.
