Nesër do të zhvillohet seanca e radhës parlamentare, ku do të prezantohet programi qeverisës. Konferenca e Kryetarëve u mblodh sot për të vendosur se si do të zhvillohet seanca.
Partia Demokratike kërkoi debat pa limit kohor. Në përfundim u vendos që deputetët të kenë nga 10 minuta kohë në Kuvend për debat mbi këtë çështje.
Deri të premten pritet të jetë miratuar qeveria e re dhe më pas të bëhet betimi në presidencë për të konsoliduar qeverinë e katërt të Edi Ramës.
Më poshtë programi qeverisës që Edi Rama pritet që të prezantojë nesër në Kuvend në mandatin e katërt.
Programi ndahet në tre shtylla kryesore: Shqipëria Europiane, Rritja Ekonomike e Qëndrueshme dhe Mirëqenie për të Gjithë. Programi synon modernizimin e shtetit, integrimin europian dhe përmirësimin e standardit të jetesës.
Prioritet mbetet anëtarësimi në Bashkimin Europian deri në vitin 2030. Programi thekson digjitalizimin e administratës dhe sigurinë kibernetike, përmes platformës “e-Albania 2.0” dhe përdorimit të inteligjencës artificiale për shërbime publike.
Reforma në drejtësi do të konsolidohet me miratimin e kodit të ri penal e atij civil, përmirësimin e infrastrukturës gjyqësore dhe reduktimin e korrupsionit. Po ashtu, parashikohet forcimi i diplomacisë dhe i rolit të diasporës në zhvillim.
Programi qeverises i Rames per mandatin e katert
