Kryeparlamentari Niko Peleshi reagoi pas miratimit të programit politik të mazhorancës dhe përbërjes së re të Këshillit të Ministrave në seancën plenare të sotme, duke e cilësuar këtë si një hap thelbësor për realizimin e vizionit qeverisës të Shqipërisë 2030.
Pavarësisht bllokimit dhe tensioneve nga opozita gjatë diskutimeve, miratimi u finalizua me votat e socialistëve, ndërsa Peleshi theksoi se puna e Kuvendit do të vazhdojë në përputhje me Kushtetutën, rregulloret dhe Kodin e Etikës, duke garantuar transparencë dhe standarde të larta pune.
“Në seancën e sotme plenare miratuam programin politik dhe përbërjen e Këshillit të Ministrave, një hap i rëndësishëm për të çuar përpara vizionin qeverisës të vendit për #Shqipërinë2030.
Kuvendi i Shqipërisë do të vijojë punën e tij, të mbështetur në Kushtetutë, Rregullore dhe Kodin e Etikës, duke garantuar standarde të larta pune dhe transparence, në përputhje me praktikat më të mira të parlamenteve të vendeve të Bashkimit Europian ku synojmë të integrohemi”.
Kreu i Grupit Parlamentar të PD-së, Gazment Bardhi ka paralajmëruar se opozita do të nisë procedurat për të kërkuar shkarkimin nga detyra të kryetarit të Kuvendit, Niko Peleshi.
“PD ka vendosur nisjen e procedurave parlamentare, mocion për shkarkimin e kryetarit të kuvendit, Niko Peleshi. Nuk është kryetar por një kukull që urdhërohet nga Rama sesi duhet të sillet me Kushtetutën dhe i marrë peng për shkak të aferave të tij me Klodian Zoton nga Rama.
Ne kemi të drejtën dhe numrin e nevojshëm për të nisur procedurën parlamentare për shkarkimin e Kryetarin e Kuvendit. Është akti më i rëndë, nuk ka ndodhur kurrë që të drejtosh vetëm 2 seanca dhe në të dyja të shkelësh Kushtetutën. Do të ketë vendime hap pas hap të grupit parlamentar”, tha Bardhi.
