Edison Memolla, kryetari aktual i Bashkisë Rrogozhinë, ka dorëzuar ankim në Gjykatën e Apelit të Posaçëm kundër vendimit që e dënon me 1 vit burg për korrupsion zgjedhor. Përmes avokatit të tij, ai kundërshton vendimin e Shkallës së Parë, e cila e shpalli fajtor në janar 2024.
Sipas dosjes gjyqësore, Memolla akuzohet se ka ndikuar te një punonjës i OSHEE për të mos ndërprerë energjinë elektrike ndaj një qytetari në prag të zgjedhjeve lokale të 6 marsit 2022, me qëllim sigurimin e votës.
Gjykata vendosi gjithashtu ndalimin e ushtrimit të funksioneve publike për një periudhë 5-vjeçare. Bashkë me të, janë dënuar edhe tre persona të tjerë të përfshirë në këtë skemë.
Ndërkohë, burime nga organet hetimore bëjnë me dije se ndaj Memollës vijojnë hetimet për çështje të tjera, përfshirë dyshime mbi menaxhimin e fondeve të rindërtimit dhe pasurinë.
