Kryeministri në detyrë i Kosovës, Albin Kurti, ka reaguar me shqetësim për raportimet e dyshimta që lidhen me rezultatet e zgjedhjeve në komunën e Mitrovicës së Jugut.
Ai ka paralajmëruar se këto ngjarje duhet të hetohen thellësisht, duke e cilësuar situatën jo thjesht si një gabim teknik, por si një ndërhyrje të paramenduar dhe flagrante në procesin zgjedhor.
Në një deklaratë për media, Kurti ka vënë në dukje se publikimi i exit-poll-eve të pasakta dhe lajmeve të rreme para mbylljes së vendvotimeve përbën një cenim serioz të integritetit të zgjedhjeve dhe demokracisë në vend.
“Ajo çka ndodhi më 12 tetor rreth raportimeve për Mitrovicën duhet hetuar e hulumtuar. Nuk bëhet fjalë vetëm për huqje, por një inxhiniering të paramenduar, për ndërhyrje flagrante në procesin zgjedhor. Exitpollet e prezantuara gabimisht me 16 pikë të përqindjes dallim e më tepër se aq nga më shumë se një organizatë dhe për të njëjtën komunë, dhe postimi i lajmeve të rreme se kush ishte fituesi ende pa u mbyllur vendvotimet, nuk janë thjeshtë huqje por cenim i demokracisë, i zgjedhjeve të lira dhe i integritetit e i sigurisë së shtetit tonë. I ftoj organet e sigurisë dhe drejtësisë të merren me këtë çështje”, ka deklaruar Kurti.
