Vazhdon dita e dytë e protestës pa afat të naftëtarëve të kompanisë Bankers në Marinzë, ndërkohë që 10 prej tyre ndodhen në ditën e tretë të grevës së urisë në ambientet e zyrës së sindikatës, që ndodhet në fushën naftëmbajtëse.
Naftëtarët janë në protestë, ndërsa puset e prodhimit të naftës janë lënë pa mbikëqyrje, pa punonjës që t’i kontrollojnë. Punëtorët kanë pezulluar punën në fushë, duke qëndruar për orë të tëra jashtë godinës, ku grupi prej 10 punonjësish vijon grevën e urisë.
Kryetari i Sindikatës së Sektorit të Hidrokarbureve, Dritan Shaho, deklaroi se protesta vjen pas një sërë kërkesash të përsëritura nga punëtorët, të cilat nuk janë marrë parasysh nga drejtuesit e kompanisë.
