Presidenti i Republikës, Bajram Begaj, u solidarizua me protestën në sheshin “Skënderbej” në Tiranë, ku po kërkohet lirimi i luftëtarëve të Ushtrisë Çlirimtare të Kosovës që mbahen në Hagë.
Përmes një postimi në Facebook, kreu i shtetit theksoi se UÇK-ja është themeli i lirisë së Kosovës dhe një pjesë krenare e historisë kombëtare, që askush nuk mund ta fshijë.
“UÇK-ja është themeli i lirisë së Kosovës. Ajo është krenari e historisë sonë kombëtare. Askush nuk mund të zhbëjë këtë trashëgimi trimërie, sakrifice e heroizmi.”
Edhe pse nuk ishte fizikisht prezent në protestë, Begaj shoqëroi postimin me një foto nga ngjarja, duke treguar mbështetjen e tij për kauzën.
