Kryeministri britanik Keir Starmer pritet t’i bëjë thirrje vendeve anëtare të Aleancës së të Gatshmëve, një grup që mbështet Ukrainën, të rrisin ndihmën në armë me rreze të gjatë veprimi për Kievin.
Deklarata e tij vjen përpara takimit që Starmer do të zhvillojë sot në Londër me presidentin ukrainas Volodymyr Zelensky, një ditë pas samitit të Bashkimit Evropian në Bruksel ku Zelensky mori pjesë.
Takimi në Londër do të përfshijë edhe kryeministren daneze Mette Frederiksen, homologun holandez Dick Schoof dhe Sekretarin e Përgjithshëm të NATO-s, Mark Rutte. Rreth 20 udhëheqës të tjerë, përfshirë presidentin francez Emmanuel Macron, do të marrin pjesë përmes video-lidhjes.
Aleanca e të Gatshmëve, e përbërë kryesisht nga vende evropiane, bashkëkryesohet nga Starmer dhe Macron. Sipas zyrës së kryeministrit britanik, qëllimi është të vendoset Ukraina “në pozicionin më të fortë të mundshëm ndërsa afrohet dimri”.
Përveç thirrjes për furnizim të shtuar me armë, Starmer do të kërkojë që partnerët e tij të përfundojnë punën për përdorimin e burimeve ruse në mënyrë që të lirohen miliarda euro për mbështetjen e Ukrainës dhe rritjen e donacioneve ushtarake. Aktualisht, disa vende evropiane furnizojnë Ukrainën me raketa si SCALP dhe Storm Shadow, por në sasi të kufizuara.
