Ish-sekretari i përgjithshëm i Ministrisë së Brendshme, Plarent Ndreca, është i vetmi nga 15 të pandehurit në çështjen e abuzimeve me tenderat për supervizimin e ndërtimit të katër komisariateve të policisë që nuk ka kërkuar gjykim të shkurtuar.
Përmes avokatit të tij, ish-deputeti socialist ka kërkuar gjykim me procedurë të zakonshme, si dhe kalimin e çështjes në Gjykatën Penale të Tiranës, pasi ai tashmë nuk gëzon më statusin e subjektit të posaçëm.
Seanca e kësaj të hëne u shty për shkaqe procedurale, ndërsa dosja ka kaluar për gjykim në themel.
Ndreca u mor i pandehur nga SPAK më 25 tetor, për veprën penale “Shkelja e barazisë së pjesëmarrësve në tendera apo ankande publike”, kryer në bashkëpunim, në kohën kur Ministria e Brendshme drejtohej nga Sandër Lleshaj.
Në total, 13 persona akuzohen për “shkelje të barazisë në tendera”, ndërsa 3 të tjerë për “falsifikim dokumentesh”, të gjitha në bashkëpunim.
