Agjencia e Mbikëqyrjes Policore (AMP) ka pezulluar nga detyra dy punonjës të pikës kufitare Hani i Hotit, pasi akuzohen se kanë lejuar kalimin e një kamioni me targa të Bosnjë- Hercegovinës që transportonte drogë të dyshuar të tipit marihuanë.
Pas kontrollit të ushtruar në kamion janë gjetur 114 pako PVC, me përmbajtje të një lënde bimore të ngjashme me lëndën narkotike mariuhanë, me peshë bruto 131.7kg.
Të pezulluarit nga detyra janë:
Besmir Qershia, me detyrë Ndihmës Specialist, kontrollor në pikën e kalimit kufitar “Hani i Hotit”.
Elvis Kuti., me detyrë Trupë Shërbimi, kontrollor në vijën e dytë në po të njëjtën pikë kalimi.
Agjencia e Mbikëqyrjes Policore (Rajoni Shkodër – Lezhë) ka ekzekutuar vendimin e Gjykatës së Shkallës së Parë të Juridiksionit të Përgjithshëm Shkodër, e cila ka caktuar masat e sigurimit personal “Pezullim i ushtrimit të një detyre a shërbimi publik” dhe “Detyrim për tu paraqitur në policinë gjyqësore” parashikuar në nenet 242 dhe 234 të Kodit të Procedurës Penale, për dy punonjës policie të dyshuar për kryerjen e veprës penale “Shpërdorim i detyrës” parashikuar në nenin 248 të Kodit Penal.
Vijojnë hetimet për zbardhjen e plotë të ngjarjes dhe përfshirjen e mundshme të personave të tjerë në këtë veprimtari kriminale.
