Në një seancë vendimtare për të ardhmen institucionale të vendit, mandatari i dytë për formimin e qeverisë së Kosovës, Glauk Konjufca, iu drejtua sot deputetëve me propozimin e tij për kabinetin e ri.
Pas muajsh bllokimi politik dhe dështimit të përpjekjes së parë për krijimin e qeverisë, Konjufca paraqiti para Kuvendit ekipin që synon t’i japë fund ngërçit aktual.
“Kuvendi i Kosovës, për herë të parë në historinë e tij, nuk ka arritur të votojë një qeveri. Kriza që kemi përjetuar për gjashtë muaj rrezikon të thellohet edhe më shumë nëse sot nuk krijojmë institucione funksionale. Ne duhet ta kursejmë vendin nga zgjedhje të panevojshme dhe nga kostot që ato sjellin. Formimi i kësaj qeverie është domosdoshmëri, jo vetëm për stabilitetin e shtetit, por edhe për të shmangur një tjetër cikël zgjedhor brenda pak muajsh.”
