Ambasadori i OSBE në Tiranë, Michel Tarran, ka marrë pjesë në Konferencën e 7-të Kombëtare për të Drejtën e Informimit, ku theksoi angazhimin e OSBE për të përmirësuar qasjen në informacion në Shqipëri.
Ai vlerësoi miratimin e ligjit të ri për mbrojtjen e të dhënave si një hap të rëndësishëm, duke shtuar se legjislacioni është harmonizuar plotësisht me rregulloret e BE-së.
“Dua të theksoj arritjet kryesore të bëra në mbrojtjen e të dhënave, ku ligji i ri shënon një hap përpara. Ky legjislacion është i harmonizuar plotësisht me rregulloren e BE-së dhe forcon të drejtën e individëve për mbrojtjen e të dhënave,” u shpreh Tarran.
Ai gjithashtu njoftoi se në vitin 2026 do të zhvillohen aktivitete të tjera për protokollin e KLD dhe strategjinë e komunikimit të Prokurorisë së Përgjithshme, duke vazhduar mbështetjen për përmirësimin e transparencës dhe mbrojtjes së të dhënave në vend.
