Gjatë natës dhe mëngjesit të sotëm, reshjet e shiut kanë vazhduar me intensitet të ulët në qarkun e Elbasanit, ndërsa lumi Shkumbin ka regjistruar një rritje të prurjeve, duke ngritur shqetësime për mundësinë e përmbytjeve, sidomos në zonat më të afërta me brigjet.
Njoftim:
Në qarkun Elbasan gjatë natës kanë rënë reshje shiu sporadike me intensitet të ulët. Edhe mëngjesin e sotëm, reshjet vijojnë me të njëjtin intensitet. Situata deri në këto momente paraqitet pa probleme.
Në aksin rrugor nacional Elbasan-Qerret, në vendin e quajtur Dragostunjë, ka pasur ndërhyrje rreth orës 03:00 nga firma kontraktuese për pastrimin e aksit nga një masiv dheu. Pas ndërhyrjes, qarkullimi vijon normalisht.
Prurjet e lumit Shkumbin janë mbi mesataren e tij, por deri tani nuk paraqesin probleme. Po ashtu, edhe perroi i Zaranikës dhe i Paprit janë në nivele normale.
Vijojnë shkarkimet nga HEC-i i Banjës që, që prej mesditës së djeshme, kanë arritur nivele të larta. Në orën 09:00 pritet një rritje e mëtejshme në shkarkime, që do të arrijnë në 290 m3/sek, dhe së bashku me prodhimin do të jenë 390 m3/sek.
Janë njoftuar bashkitë Cerrik dhe Belsh për të qenë në gatishmëri në zonën ku kalon lumi Devoll, për të ndërhyrë në rast të mundshëm të përmbytjeve.
