Qytetarë në disa kryeqytete evropiane dolën këtë fundjavë në protesta në mbështetje të demonstruesve në Iran.
Në Londër, protestuesit u mblodhën pranë Downing Street, duke valëvitur flamuj iranianë të periudhës para-revolucionare dhe duke mbajtur pankarta në mbështetje të opozitës iraniane.
Pjesëmarrësit theksuan se protestat brenda Iranit vazhdojnë dhe po forcohen, ndërsa kërkuan nga qeveritë perëndimore që të shprehin hapur mbështetjen e tyre për popullin iranian. Sipas protestuesve, ndryshimi demokratik duhet të vijë nga vetë shoqëria iraniane.
Tubime të ngjashme u zhvilluan edhe në Paris dhe Berlin, ku demonstruesit marshuan me flamuj, muzikë dhe pankarta simbolike, duke kujtuar lëvizjet protestuese të viteve të fundit dhe duke shprehur solidaritet me gratë dhe qytetarët iranianë që kërkojnë liri dhe të drejta themelore.
