Në kuadër të një proteste që do të zhvillohet nga Shoqata e Transportuesve të Mallrave të Maqedonisë së Veriut, autoritetet kanë njoftuar bllokimin e përkohshëm të lëvizjes së mallrave përmes pikave kufitare që lidhin Shqipërinë me Maqedoninë e Veriut.
Bllokimi do të fillojë më 26 janar 2026, në orën 00:01, për hyrjen e mjeteve të transportit të mallrave në Maqedoninë e Veriut, ndërsa dalja nga territori i saj do të bllokohet nga ora 12:00 e po të njëjtës datë.
Ky bllokim nuk do të prekë lëvizjen e automjeteve të udhëtarëve, të cilët mund të kalojnë kufirin pa kufizime. Gjithashtu, mjetet që transportojnë medikamente mjekësore dhe bagëti do të lejohen të kalojnë normalisht, përjashtim ky që synon të parandalojë pengesat në furnizimin me nevojat bazë.
Autoritetet i bëjnë thirrje subjekteve të transportit dhe qytetarëve të informohen dhe të marrin masa paraprake për të shmangur vonesat dhe komplikimet e mundshme gjatë periudhës së protestës. Ky bllokim pritet të ndikojë në transportin e mallrave, por nuk do të ketë pasoja për lëvizjen e udhëtarëve.
