Mario Mitaj është rikthyer të luajë si titullar për Al Itihad, duke qenë pjesë e formacionit në barazimin 2-2 ndaj Al Fateh, në një moment kyç për skuadrën arabe. Mbrojtësi shqiptar ka përfituar nga një zhvillim i papritur, pas problemit të krijuar mes klubit dhe yllit të tij, Karim Benzema, i cili refuzoi një ofertë financiare nga drejtuesit e Al Itihad.
Benzema është në muajt e fundit të kontratës dhe gjatë negociatave për rinovimin e marrëveshjes, klubi i ka ofruar një propozim shumë më të ulët se aktualisht, duke e fyer futbollistin dhe përfaqësuesit e tij. Ky propozim është refuzuar dhe, si pasojë, Benzema ka vendosur të mos marrë pjesë në ndeshjet e ardhshme, duke krijuar një mundësi për një të huaj tjetër në formacion.
Mitaj ka përfituar nga ky hapësirë dhe është përfshirë në rreshtim për ndeshjen e sotme. Pas periudhës së alternuar mes tribunës dhe fushës, ky është një shans i shkëlqyer për mbrojtësin shqiptar të tregojë aftësitë e tij dhe të forcojë pozitat e tij në skuadër.
