Irani ka shprehur gatishmërinë për të rinisur bisedimet me Shtetet e Bashkuara, por ka theksuar se negociatat duhet të jenë të bazuara në “drejtësi” dhe se kapacitetet mbrojtëse të vendit nuk mund të jenë pjesë e këtyre diskutimeve. Ky qëndrim u shpreh nga ministri i Jashtëm iranian, Abbas Araghchi, në një konferencë për shtyp gjatë vizitës së tij në Turqi, ku ai po zhvillonte bisedime me homologun turk.
Araghchi theksoi se Irani është i gatshëm për dialog, por vetëm nëse janë të garantuara kushte të barabarta. “Nëse bisedimet janë të drejta, Irani është i gatshëm të angazhohet në to,” shtoi ai. Ai gjithashtu konfirmoi se për momentin nuk ka asnjë takim të planifikuar mes Teheranit dhe Uashingtonit.
Në këtë kontekst, Araghchi u përgjigj edhe ndaj kërcënimeve ushtarake të SHBA-ve, duke thënë se Irani është i gatshëm të përballet me çdo situatë, qoftë përmes diplomacisë, qoftë përmes forcës, nëse do të jetë e nevojshme. Këto deklarata pasuan thirrjen e presidentit amerikan, Donald Trump, për të diskutuar me Iranin, ndërkohë që SHBA ka dërguar një tjetër anije luftarake në Lindjen e Mesme.
