Një varkë, e cila shërbente për shëtitje me turistë gjatë sezonit veror, është mbytur gjatë natës në zonën e Ksamilit. Mjeti lundrues ishte ankoruar në breg të detit dhe është konstatuar të mbytur mëngjesin e sotëm nga pronari i tij. Pas njoftimit, varka është nxjerrë nga uji me ndihmën e një vinçi.
Pas kontrollit, është vënë re se tapat e varkës ishin hequr qëllimisht, gjë që ka ngritur dyshime për një akt të qëllimshëm. Pronari i varkës ka shprehur dyshimet se ngjarja mund të ketë lidhje me konkurrencën në sektorin e shërbimeve turistike në zonë.
Autoritetet janë angazhuar për të hetuar më tej këtë ngjarje dhe për të sqaruar rrethanat e plota të incidentit.
