Partia në pushtet e Japonisë, e udhëhequr nga kryeministrja Sanae Takaichi, ka fituar bindshëm zgjedhjet e parakohshme parlamentare të mbajtura të dielën.
Transmetuesi publik i Tokios kombëtar njoftoi se Partia Liberale Demokratike (LDP), së bashku me partinë aleate Ishin, ka siguruar mbi dy të tretat e vendeve në Dhomën e Ulët të Parlamentit, deri në 328 nga gjithsej 465 mandate.
Kjo shumicë e cilësuar i jep LDP-së mundësinë të anashkalojë Dhomën e Lartë, ku partia nuk gëzon shumicën.
Kryeministrja e parë grua në historinë e Japonisë vendosi të shpallë zgjedhje të parakohshme për të rinovuar mandatin e saj, vetëm katër muaj pas marrjes së drejtimit të LDP-së. Ajo kishte paralajmëruar se do të jepte dorëheqjen nëse partia e saj nuk do të siguronte shumicën parlamentare, duke e kthyer këtë proces elektoral në një rrezik të madh politik.
Një rol të rëndësishëm në këtë fitore luajti popullariteti personal i Takaichit, pasi nivelet e miratimit të qeverisë së saj mbeten mbi 70%.
Kjo fitore vjen në kontrast të fortë me dy paraardhësit e saj, gjatë mandateve të të cilëve partia humbi shumicën parlamentare për shkak të skandaleve të korrupsionit dhe rritjes së shpenzimeve publike.
Në vitin 2024, LDP humbi shumicën në të dyja dhomat e Parlamentit, ndërsa u shpërbë edhe aleanca dhjetëvjeçare me partinë Komeito. Kjo e fundit bashkoi forcat me Partinë Kushtetuese Demokratike të Japonisë, duke formuar bllokun më të madh opozitar në Dhomën e Ulët. Në këtë kontekst, Takaichi dhe LDP u përballën me një opozitë më të bashkuar se në të kaluarën.
Aleancat e udhëhequra nga LDP kanë qeverisur Japoninë gjatë pjesës më të madhe të historisë së saj pas Luftës së Dytë Botërore, shkruan BBC.
Zgjedhjet u zhvilluan në kushte të vështira moti, me anulime të njëpasnjëshme të linjave hekurudhore dhe atyre detare. Mbajtja e zgjedhjeve gjatë dimrit është një ngjarje e rrallë në Japoni, hera e fundit kishte ndodhur 36 vite më parë.
