Avokati i Hashim Thaçit, Luka Misetiç, ka komentuar kërkesën e Prokurorisë së Specializuar në Hagë, duke argumentuar se është një padrejtësi të konsiderohet Thaçi përgjegjës për krime, kur, sipas tij, shembuj të tjerë si ai i Milan Milutinoviq, presidentit serb të dikurshëm, tregojnë se udhëheqësit e shteteve të organizuara nuk janë trajtuar po në të njëjtën mënyrë.
Misetiç theksoi se Prokuroria po kërkon të ngrejë akuza bazuar në një deduksion të gabuar ligjor, duke e quajtur këtë një padrejtësi historike dhe ligjore.
“ZPS-ja po kërkon që, pavarësisht se presidenti serb i një shteti të organizuar nuk ka pasur përgjegjësi penale për krimet masive të luftës dhe krimet kundër njerëzimit, duke u bazuar në faktin që ai nuk kishte kontroll efektiv, të arrihet përfundimi që udhëheqësi politik i shqiptarëve të Kosovës dhe UÇK-së, një grup i armatosur joshtetëror që ekzistonte vetëm për disa muaj, kishte kontroll efektiv dhe ishte penalisht përgjegjës. Ky rezultat do të ishte një padrejtësi ligjore dhe historike,” tha Luka Misetiç.
