Në një zhvillim të rëndësishëm për Shqipërinë dhe për sigurinë rajonale, ministrat e Mbrojtjes të vendeve anëtare të NATO-s u mblodhën sot në Bruksel për të diskutuar mbi objektivat e ardhshëm dhe rritjen e kapaciteteve të Aleancës.
Një nga arritjet kryesore të këtij takimi ishte përfshirja e Korridorit 8 të Shqipërisë në infrastrukturën kritike të Aleancës, një hap që do të forcojë sigurinë dhe mbrojtjen kolektive në rajon.
Ministri i Mbrojtjes, Pirro Vengu, njoftoi përmes rrjeteve sociale se “në Ministerialin e Mbrojtjes, Korridori 8, me pikënisje në kompleksin detar Durrës–Porto Romano dhe dalje në Detin e Zi, u përfshi zyrtarisht në planet dhe infrastrukturën kritike të Aleancës”. Sipas Vengut, kjo është një arritje që pozicionon Shqipërinë në qendër të planeve rajonale dhe siguron një hapësirë strategjike për Aleancën në vitet në vijim. Kryeministri Edi Rama gjithashtu e vlerësoi këtë zhvillim, duke theksuar se “Korridori 8, me pikënisje në kompleksin detar Durrës–Porto Romano dhe dalje në Detin e Zi, u njoh zyrtarisht si korridor sigurie për mbrojtjen kolektive”, një hap që do të forcojë ndjeshëm sigurinë rajonale.
