Hungaria ka vendosur të bllokojë kredinë emergjente prej 90 miliardë eurosh për Ukrainën, duke akuzuar autoritetet ukrainase për shantazh politik lidhur me një tubacion të dëmtuar nafte, që përdoret për furnizimin me energji nga Rusia.
Ky veprim ka shkaktuar tensione të reja midis Hungarisë dhe Bashkimit Evropian, duke shtuar përplasjet përpara zgjedhjeve të përgjithshme të Hungarisë që do të mbahen në prill.
Ministri i Jashtëm i Hungarisë, Péter Szijjártó, tha se Ukraina ka ndaluar qëllimisht tranzitin e naftës përmes tubacionit Druzhba, në koordinim me Brukselin dhe opozitën hungareze, me qëllim për të shkaktuar shqetësime të mëdha energjetike dhe rritje të çmimeve të karburantit në Hungari, duke përfituar në këtë mënyrë politikisht para zgjedhjeve.
“Po bllokojmë kredinë prej 90 miliardë eurosh të BE-së për Ukrainën derisa të rifillojë tranziti i naftës në Hungari nëpërmjet tubacionit Druzhba,” tha Szijjártó. Ai theksoi se ky veprim i Ukrainës është një shantazh i drejtpërdrejtë ndaj Hungarisë, me qëllim për të pasur ndikim në politikën e brendshme të vendit.
