Gjykata e Posaçme ka vendosur dënimin për Klajdi Zhillën dhe Geraldo Fuçijan, të akuzuar për korrupsion pasiv të personave që ushtrojnë funksione publike.
Pas shqyrtimit të çështjes me procedurën e gjykimit të shkurtuar, gjykata ka shpallur të dy fajtorë dhe ka dhënë një dënim fillestar prej 3 vitesh burgim për secilin.
Megjithatë, për shkak të aplikimit të gjykimit të shkurtuar, dënimi u ul me një të tretën, duke e reduktuar atë në 2 vjet burgim.
Gjykata ka vendosur gjithashtu që ekzekutimi i dënimit të pezullohet dhe të dy të pandehurit të kalojnë një periudhë prove prej 2 vitesh.
Nëse ata nuk kryejnë vepra të tjera penale dhe mbajnë kontakte me Shërbimin e Provës, dënimi mund të shmanget.
Përveç kësaj, ndaj të dyve është vendosur heqja e të drejtës për të ushtruar funksione publike për 5 vjet.
Masat e sigurimit janë ndryshuar dhe të pandehurit do të lirohen nga paraburgimi, përveç nëse ka ndonjë arsye tjetër për mbajtjen e tyre.
