Lamar Odom, ish-basketbollisti i njohur i NBA-së, ka folur sërish për varësinë e tij të njohur nga droga.
Në një bisedë me Tracy McGrady dhe Vince Carter në podkastin “The Cousins”, ish-lojtari i Los Angeles Clippers, Miami Heat, Los Angeles Lakers dhe Dallas Mavericks konfirmoi se kishte konsumuar drogë, konkretisht kokainë, sidomos gjatë verës.
Odom, i cili në vitin 2015 pothuajse humbi jetën (ra në koma) pas një mbidoze me kokainë dhe stimulantë në një bordello, e përkufizon veten si “një i varur”.
“Në vitin 2015 më pëlqenin drogat, seriozisht. Po flisni me një të varur të vërtetë. Konsumoja kokainë, nuk kisha detyrime”, rrëfeu ai. Dy herë kampioni i NBA-së theksoi:
“Nuk konsumoja drogë ndërsa luaja, por gjatë verës po. Do të ishte çmenduri të konsumoja kokainë dhe të luaja në të njëjtën kohë. Kam pasur disa vera të pabesueshme me kokainë. Mendoja se e kisha nën kontroll, por kur ke mendjen e një të alkoolizuari, mendon si ta mashtrosh sistemin. Dhe këtë bëra, festa me kokainë”, u shpreh ai sinqerisht.
Odom beson se kishte potencial, “vetëm falë talentit”, për të hyrë në Sallën e Famës së basketbollit:
“Të jemi të sinqertë, po xhiroja një ‘reality show’ (me ish-bashkëshorten time Khloe Kardashian) gjatë sezonit. Kjo do të thotë se po luaja, fitova çmimin Lojtari i Vitit dhe vazhdoja të xhiroja ‘reality show’-n. Kështu që e di se kisha motivimin dhe personalitetin e duhur”.
Odom foli edhe për mënyrën se si nisi varësia e tij.
“Marijuana. Shumë njerëz nuk e trashëgojnë varësinë gjenetikisht. Babai im ishte i varur nga heroina. Marijuana nuk të çon menjëherë të thuash: ‘Më lër të provoj kokainë’. Fillova të pija duhan në moshën 14 ose 15 vjeç. Është edhe çështje traume. Nëna ime vdiq kur isha 12 vjeç…
Do të shpërthesh pasi humbet nënën, ajo ishte shoqja ime më e mirë… Mbaj mend që në moshën 10-vjeçare i thashë se do të shkoja në NBA dhe do t’i blija një shtëpi të madhe, por në moshën 12-vjeçare ajo nuk ishte më”, rrëfeu ish-basketbollisti Lamar Odom (46 vjeç).
Ai sapo ka dalë nga klinika “iRely Recovery” në Los Anxhelos, pasi përfundoi një program rehabilitimi 30-ditor. Ish-lojtari u fut në program pasi u arrestua për drejtim mjeti nën ndikimin e alkoolit.
