Një rrëshqitje toke ka shkaktuar dëmtime të konsiderueshme në rrugën pranë liqenit të Gjinarit, një nga fshatrat më të vizituara turistikisht në Bashkinë e Elbasanit.
Dëmtimi i asfaltit në këtë aks ka krijuar kushte të rrezikshme për qarkullimin e automjeteve dhe ka vënë në rrezik sigurinë e banorëve dhe vizitorëve.
Ky segment rrugor është shumë i rëndësishëm, pasi lidh fshatra të ndryshëm të zonës dhe përdoret vazhdimisht nga automjetet private dhe ato të transportit.
Dëmtimi i rrugës ka bërë që lëvizja të bëhet më e vështirë, duke përbërë një kërcënim të drejtpërdrejtë për sigurinë e drejtuesve të mjeteve dhe pasagjerëve.
Fshati Gjinari, i njohur për bukuritë natyrore dhe turizmin, ka përjetuar problematika të ngjashme infrastrukturore në disa prej akseve rrugore që çojnë atje.
Megjithatë, pavarësisht investimeve të fundit nga Bashkia Elbasan për përmirësimin e kushteve në qendër, rrugët lidhëse mbeten të dëmtuara dhe të pasigurta.
