Partia Socialiste zhvillon mbledhje me grupin parlamentar këtë të hënë, 9 mars, për të shqyrtuar raportin e socialistëve në Këshillin e Mandateve mbi kërkesën e SPAK për procedurat ndaj ish-ministres Belinda Balluku. Mazhoranca e ka sinjalizuar se nuk do të japë autorizim për arrestim.
“Masa nuk prodhon më asnjë pasojë juridike reale, por edhe narrativa mbi të cilën SPAK-u ka ndërtuar kërkesën, mbetet thelbësisht hipotetike, për sa kohë lidhet drejtpërdrejt me ushtrimin e funksioneve ekzekutive që deputetja në fjalë nuk i ushtron më.
Është detyrim ndaj qytetarëve të dalim me këtë raport, për një çështje që është shndërruar në mënyrë të padrejtë në debat të mbingarkuar politikisht. Në vend të një procesi të qetë e të rregullt ligjor, e kemi parë si gjyq publik. Pikërisht, për këtë arsye është e domosdoshme që ne si shumicë të flasim qartë”, deklaroi Ulsi Manja.
