Mohsen Rezaei, ish-komandant i Gardës së Revolucionit dhe anëtar i Këshillit për Interesat e Shtetit të Iranit, ka dhënë një paralajmërim të fortë pas sulmeve të mundshme ndaj infrastrukturës iraniane, duke theksuar se çdo veprim i tillë do të ketë pasoja të rënda.
Në një deklaratë për televizionin shtetëror, Rezaei e cilësoi çdo ndërhyrje si një akt që do të paralizojë Shtetet e Bashkuara dhe do të dëmtojë rëndë pozitat e SHBA-së në rajon. Ai shtoi se “SHBA do të mbytet në Gjirin Persik” dhe se “ditët e fundit të mbijetesës amerikane po mbarojnë”.
Rezaei theksoi se lufta do të vazhdojë deri sa të rikuperohen të gjitha dëmet dhe të hiqen sanksionet ekonomike, duke siguruar që SHBA të mos ndërhyjë më në punët e Iranit. Sipas tij, ky është vendimi i kombit iranian, i udhëheqësit dhe i forcave të armatosura.
Ndërkohë, Presidenti amerikan Donald Trump njoftoi se SHBA dhe Irani kishin zhvilluar “biseda produktive” dhe se do të pezullojë sulmet ndaj centraleve të energjisë iraniane për një periudhë pesë-ditore.
Nga ana tjetër, kryetari i Parlamentit iranian, Mohammad-Bagher Ghalibaf, deklaroi përmes një postimi në X se nuk po zhvillohen negociata me Shtetet e Bashkuara dhe se nuk është i përfshirë në asnjë bisedim të tillë.
