Si rezultat i arritjes së disa marrëveshjeve ndërmjet Kosovës dhe Shqipërisë, nisi zbatimi i planit operacional për adresimin e barrierave ekonomike e tregtare midis këtyre dy shteteve.
Kështu bëri të ditur ministrja e Industrisë, Ndërmarrësisë dhe Tregtisë, Rozeta Hajdari gjatë raportimit në Komisionin për Ekonomi.
Ndërsa, kryetari i Komisionit, Ferat Shala ka pyetur ministren Hajdari për mundësinë e krijimit të lehtësirave për regjistrimin e bizneseve të Shqipërisë në Kosovë.
Ministrja Hajdari tha se pikërisht për këtë qëllim, kanë ngritur Sekretariatin për adresimin e barrierave tregtare Kosovë-Shqipëri, edhe sa i përket regjistrimit të bizneseve.
“Për këtë qëllim ne si Qeveri kemi pasur takim ndërqeveritar me Republikën e Shqipërisë dhe së bashku me ministren e Ekonomisë, jemi në plan operacional për lehtësimin e të bërit biznes në të dy shtetet, në Kosovë dhe Shqipëri. Dhe një ndër to është që të kemi edhe lehtësi për regjistrime të bizneseve. Përveç barrierave tregtare që kanë qenë të shprehura aty këtu në kufi dhe është ngritur sekretariati për këtë çështje mes Shqipërisë dhe Kosovës për të rritur bashkëpunimin ekonomik dhe në fushat e tjera si në arsim dhe të tjera mes dy republikave. Pra, ne kishim pas disa marrëveshje të bashkëpunimit shumë të mira, por nuk ka pasur plane operative konkrete si të veprojmë”, theksoi Hajdari.
