Gent Sejko është drejt një mandati të dytë në krye të Bankës së Shqipërisë.
Presidenti Ilir Meta publikoi sot dekretin që i propozon Kuvendit të Shqipërisë rizgjedhjen e Sejkos edhe për një tjetër mandat.
Sejko pak ditë më parë u zgjodh anëtar i Këshillit Mbikqyrës së Bankës së Shqipërisë, që është hapi i parë drejt postit të Guvernatorit.
“Vlerësojmë politikën e Bankës së Shqipërisë, që ka qenë akomoduese për të ofruar mbështetjen e nevojshme për rimëkëmbjen ekonomike si pasojë e tërmetit dhe pandemisë, si dhe për të lehtësuar konsolidimin fiskal.
Gjithashtu është për t’u nënvizuar roli i Bankës së Shqipërisë për të siguruar, që sektori financiar të mbetet i qëndrueshëm dhe likuid. Megjithatë, në kushtet kur inflacioni total është rritur për shkak të çmimeve më të larta të ushqimeve dhe energjisë, Banka e Shqipërisë duhet të vazhdojë të monitorojë nga afër zhvillimet e inflacionit dhe të rregullojë qëndrimin e politikës në përputhje me objektivin e saj për ruajtjen e stabilitetit të çmimeve.
Rreziku i rritjes së kredive me probleme shton rëndësinë e një monitorimi të ngushtë të cilësisë së portofolit të kredisë së bankave, ruajtjen e rezervave të kapitalit dhe forcimin e kornizave të zgjidhjes së kredive të këqija.
Të gjithë aktorët duhet të bëjnë përpjekje të përbashkëta për të monitoruar dhe menaxhuar më mirë rreziqet fiskale në rritje që lidhen me rritjen e borxhit publik dhe të ekspozimit ndaj rritjes së portofolit të projekteve të Partneritetit Publik Privat”, thuhet në njoftimin e Presidencës.
Tashmë është në dorën e shumicës socialiste në Kuvend për t’i dhënë ose jo mandatin e dytë.
/5pyetjet.al
