Lulzim Basha vijoi me akuzat ndaj qeverisë për aferën e inceneratorëve. Kreu demokrat u shpreh se sa herë drejtësia e afrohet një ministri të përfshirë në korrupsion, Rama e ka shkarkuar.
I pyetur se kush e ka radhën prej ministrave, Basha tha se pavarësisht e kujt është radha, ajo nuk duhet të përfundojë derisa të shkojë te kreu i aferës.
“Fjalë ka plot, siç i kam dëgjuar unë i keni dëgjuar dhe ju. Unë nuk i referohem fjalëve por precedentëve. Precedentët janë që sa herë drejtësia, siç është nën presion publik, nën presionin e aleatëve gjeostrategjikë, sa herë që i janë afruar një ministri, ka dhënë dorëheqjen. Përvoja na tregon që këta ndjekin një praktikë ku sa herë nxehtësia e drejtësisë në veprim i afrohet një prej krerëve politik dhe mundohen të zgjasin procesin me marifete. Përgjigja ime, e kujtdo është radha, nuk përfundon derisa të shkojë në krye”, tha Basha.
