Vetëm një kandidat është zyrtarizuar për zgjedhjet presidenciale të Serbisë, që zhvillohen në prill. Ai është gjenerali serb Zdravko Ponosh, kandidat i listës “Serbia e bashkuar” të cilën e përbëjnë disa parti opozitare.
Ponosh me të kaluar edhe në luftën e Kosovës, thotë se kjo çështje “nuk mund të zgjidhet brenda një mandati e ndoshta as brenda një gjenerate politike”.
“Çështja e Kosovës duhet të zgjidhet dhe secila zgjidhje duhet të jetë më e mirë se e mëparshmja”, ka thënë ai të dielën në një emision televiziv, shkruan portali “Kossev”.
Sipas tij, Kosova është pjesë e Serbisë dhe për këtë nuk ka diskutim. Po ashtu, ai ka thënë se nuk duhet të lejohet që Kosova të bëhet pjesë e OKB-së.
Ponosh, gjeneral në pension nga ushtria e Serbisë, pritet të jetë një prej kundërshtarëve të presidentit aktual serb Aleksandar Vuçiç. Ky i fundit ende nuk e ka zyrtarizuar kandidaturën, por e ka paralajmëruar.
