Armando Subashi, kryetar i Bashkisë së Fierit, ishte dëshmitari i radhës që po dëshmon në Komisionin Hetimor për inceneratorët. Gjatë dëshmisë së tij, Subashi deklaroi se ka pasur disa biseda me Klodian Zoton në momentin kur ka filluar depozitimi i mbetjeve në inceneratorin e ri.
Sipas kryebashkiakut të Fierit, bisedimet kanë qenë në kuadrin teknik për funksionimin e impiantit të përpunimit të mbetjeve.
“Po kam qenë në Prokurorinë e Posaçme përpara disa ditësh, u pyeta në cilësinë e deklaruesit. Besoj do të kem mirëkuptimin tuaj këtu sot. Për disa pyetje të caktuara, unë do të rezervohem për shpjegimet e mia. Besoj çka janë fakte publike nuk përbëjnë sekret hetimor. Por disa nga shpjegimet atje, do të rezervohem dhe do bëjë komentin përkatës për këtë çështje. Kam pasur komunikim, ndoshta 2 ose 3 herë me Klodian Zoton. Ka qenë momenti kur ka filluar depozitimi i mbetjeve në impiantin e ri të përpunimit të tyre. Kemi bërë disa biseda në kuadrin teknik, sëbashku me disa persona që kanë qenë të punësuar për administrimin e impiantit atje. Kanë qenë çështje dhe biseda teknike, për orarin pasi kemi kërkuar që të qëndrojë hapur dhe natën”, u shpreh Subashi.
/5pyetjet.al
