Deputetja ukrainase Lesia Vasylenko po i kërkonte komunitetit ndërkombëtar të jepte ndihmë të premten kur ajo u ndërpre nga zhurma e avionëve që fluturonin sipër kokës së saj, teksa ishte duke thënë se: “Burrat dhe gratë tona kanë vdekur për këtë liri”
“Nëse kjo vazhdon në nivelin që po ndodh tani, këto sulme ajrore që ndodhin, tanket që futen brenda, Ukraina nuk do të jetë në gjendje të qëndrojë për një kohë të gjatë kundër një agresioni kaq masiv rus dhe ne kemi nevojë për ndihmë,” tha ajo për CNN nga Kievi. Ajo shtoi se nevojiten më shumë sanksione, si dhe më shumë armë në Ukrainë dhe mbyllja e hapësirës ajrore të vendit.
Ajo ndaloi për pak kohë, duke hedhur një vështrim nga dritarja e saj jashtë kamerës. “Më vjen keq … ndërsa ne flasim, kishte disa avionë që fluturonin në drejtim të qytetit. Dhe ne e dimë nga fjalimi i Presidentit vetëm disa minuta më parë se sulmet ajrore do të fillojnë që tani,” tha ajo, me një zhurmë gjëmimi në sfond.”Ne të gjithë jemi të rraskapitur nga kjo, sepse kemi helikopterë, kemi aeroplanë, avionë luftarakë, që fluturojnë rreth e rrotull gjatë gjithë kohës. Dhe sa herë që dëgjojmë një zhurmë, është sikur të shikojmë nga dritarja, ku po shkon? A është ai një avion që do të godasë apo është duke rënë?”
Ajo shtoi se pavarësisht frikës, ajo ndjeu gjithashtu besim “në ushtrinë ukrainase dhe në popullin ukrainas”.
“Njerëzit këtu janë të guximshëm dhe nuk janë në gjendje të heqin dorë nga vendi i tyre,” tha ajo. “Ne nuk duam të jetojmë nën sundimin e dikujt, kushdo qoftë ai. Ne jemi një popull i lirë. Ne kemi luftuar për lirinë tonë. Burrat dhe gratë tona kanë vdekur për këtë liri.”
/5Pyetjet.al
