Janë 86, shtetasit turq, të cilët mendohet se janë të bllokuar në një xhami në qytetin e Mariupolit, ndër të cilët përfshihen edhe 34 fëmijë.
Lajmi ka ardhur nga vetë Qeveria e Turqisë, ku është bërë me dije se për shkak të bombardimeve, të gjithë këta persona po strehohen në xhaminë e Mariupolit.
Të shtunën, ishte ministri i Jashtëm i Ukrainës, Dmytro Kuleba, ai i cili bëri me dije se forcat ruse kishin bombarduar vendin pranë xhamisë së Sulltan Sulejmanit, ku turqit po strehoheshin.
Vetëm një dit më pas, ka ardhur reagimi nga homologu i tij turk, Mevlut Cavusoglu, i cili i ka kërkuar prej ditësh Rusisë t’i lejojë ata të kalojnë, pasi disa autobusë po presin për evakuimin e tyre.
Gjatë një konference për shtyp në Antalya, ai i ka bërë një tjetër kërkesë kryediplomatit rus, Sergey Lavrov, që të ndihmojë në evakuimin e qytetarëve të vendit të tij.
Nga ana tjetër, Cavusoglu ka treguar për mediat se thuajse 15 mijë qytetarë turq janë evakuuar deri tani nga Ukraina.
