Shërbimi për Çështjet e Brendshme dhe Ankesat ka nisur hetimet për Euglen Benga, me detyrë nën-oficer te Garda e Republikës dhe shoqërues i kryetares së Kuvendit, Lindita Nikolla.
Ky i fundit akuzohet se u ka drejtuar armën e shërbimit banorëve që kishin bllokuar rrugën për protestë në Paskuqan. Denoncimi u bë nga qytetarët që ishin mbledhur për të protestuar, por edhe pse në vendin e ngjarjes kishte efektivë policie, askush nuk ndërhyri që të kontrollonte Bengën.
Njoftim për media
Tiranë – Pas publikimit në media të pamjeve ku shfaqet një punonjës i Gardës së Republikës që ka nxjerrë armën e shërbimit gjatë një proteste në zonën e Paskuqanit, Shërbimi për Çështjet e Brendshme dhe Ankesat (Agjencia e Mbikëqyrjes Policore) ka nisur verifikimet për nxjerrjen e përgjegjësive dhe zbardhjen e plotë të rrethanave të ngjarjes. SHÇBA (AMP) mbetet e përkushtuar në misionin e saj për garantimin e zbatimit të ligjit dhe falënderon mediat dhe qytetarët për kontributin.
