Luigji Soreca, ambasadori i BE-së në Shqipëri ka përdorur një shprehje të kryeministrit Rama për të treguar që ka ardhur koha që Shqipëria të bëhet pjesë e Bashkimit Evropian.
“Kam udhëtuar në gjithë Shqipërinë, ndoshta disa prej jush ose unë mund të jem personi që kam udhëtuar më shumë, s’janë pak kilometra, gjithandej e kam kuptuar që njerëzit kërkojnë prioritetin kryeor, afrimin e Shqipërisë me BE.
E di që ndonjëherë qoftë publikisht qoftë privatisht më kanë ngacmuar ‘dasma po vonohet’, por mendoj që koha për dasmën ka ardhur, unazat janë gati, xixëllojnë, për këtë kohë që ka ardhur. Duam të çelen bisedat e negociatat për anëtarësim, kjo gjë duhet të kishte ndodhur por më shumë se kurrë është koha për ta bërë këtë gjë tani”, u shpreh Soreca në takimin e Këshillit Kombëtar të Integrimit Evropian.
