Në mbledhjen e fundit, këshilli i ministrave vendosi që me propozim të ministrit përkatës, Evis Kushit të bëjë një rishpërndarje fondesh në ministrinë e Arsimit dhe Sportit. Konkretisht, në buxhetin e vitit 2022 i janë hequr mbi 12 milionë lekë arsimit të lartë dhe kanë kaluar për zhvillimin e sportit.
VENDIMI
Nr. 193 datë 30.3.2022
PËR RISHPËRNDARJE FONDESH NË BUXHETIN E VITIT 2022, MIRATUAR PËR MINISTRINË E ARSIMIT DHE SPORTIT
Në mbështetje të nenit 100 të Kushtetutës; të nenit 44, të ligjit nr. 9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, si dhe të nenit 17, të ligjit nr. 115/2021, “Për buxhetin e vitit 2022”, të ndryshuar, me propozimin e ministrit të Arsimit dhe Sportit, Këshilli i Ministrave
VENDOSI:
1. Në buxhetin e vitit 2022, miratuar për Ministrinë e Arsimit dhe Sportit, të bëhet rishpërndarje e fondeve ndërmjet programeve buxhetore, si më poshtë vijon:
a) Në programin buxhetor “Arsimi i lartë” 09450, të pakësohet fondi prej 12 254 700 (dymbëdhjetë milionë e dyqind e pesëdhjetë e katër mijë e shtatëqind) lekësh, në zërin “Shpenzime korrente”;
b) Në programin “Për zhvillimin e sportit” 08140, të shtohet fondi në shumën prej 12 254 700 (dymbëdhjetë milionë e dyqind e pesëdhjetë e katër mijë e shtatëqind) lekësh, në zërin “Shpenzime korrente”.
2. Ngarkohen Ministria e Arsimit dhe Sportit dhe Ministria e Financave dhe Ekonomisë për zbatimin e këtij vendimi.
Ky vendim hyn në fuqi menjëherë dhe botohet në Fletoren Zyrtare.
