Një kosovar 32 vjeç, në gusht të vitit 2020 kishte tentuar të sulmonte një pikë karburanti në Bernë të Zvicrës duke kërcënuar shitësen me një granatë dore.
Për shkak se arkëtarja ishte aq e tronditur sa nuk mundi të hapte menjëherë arkën e parave, grabitësi ishte larguar nga dyqani pa plaçkitur. Policia Kantonale e Bernës ishte në gjendje të identifikonte shpejt autorin e dyshuar.
Tani ai është dënuar me 34 muaj burg nga gjykata rajonale në Bernë, siç raporton “Berner Zeitung”. Nga këto, ai do të vuajë si burg efektiv vetëm 12 muaj.
Për shkak se kosovari ka gati 20 vite që jeton në Zvicër, është i integruar mirë dhe asnjëherë nuk ka bërë ndonjë shkelje, ai nuk do të dëbohet nga Zvicra. Kjo supozon se nga ai nuk priten shkelje të tjera.
Megjithatë, deklaratën e të akuzuarit se ai e kishte ndërprerë grabitjen për shkak se shitësja po frikësohej, gjykata e cilësoi si një pretendim thjesht mbrojtës. Gjykata gjithashtu nuk i ka besuar deklarimit të tij se ai nuk e dinte që granata e dorës ishte e vërtetë. Procedura nuk është ende përfundimtare dhe mund të vazhdojë.
