Deputetët e grupit të PS-së kanë zgjedhur sot tre emrat e kandidatëve që preferojnë për Presidentin e ri të vendit, që do të kalojë më pas në një proces filtrimi. Kryetari i grupit, Taulant Balla udhëzoni deputetët si duhet të veprojë.
Pasi u ndanë zarfet, deputetët zgjodhën emrat dhe e futën në kuti. Njëri nga deputetët e pyeti Ballën lidhur me emrat që mund të propozohen. “Mund të kemi 74 deputetë nga 3 emra, 222 kandidatura.
Se ne socialistët jemi mirë me matematikën” tha Balla duke ironizuar gabimet e Lulzim Bashës, që vazhdojnë ta përndjekin edhe pas dorëheqjes. Në fletë përpos emrit dhe mbiemrit duhet të shkruhet edhe atësia.
“Taulant të pyes çikë unë, po qe se nuk njohim atësinë quhet e pavlefshme?”, pyeti deputetja Luljeta Bozo, por kryetari i grupit e qetësoi. “Jo, por uroj që të jetë emër publik që ta identifikojmë” tha Balla. Pritet hapja e zarfeve tani.
