Tre persona të maskuar dhe të armatosur grabitën një bankë të nivelit të dytë ditën e martë në qytetin e Koplikut.
Mësohet se autorët kanë arritur të marrin 400 mijë lekë, 1 mijë dollar dhe 1 mijë euro.
Pas grabitjes, autorët u larguan me një makinë tip “Volkswagen”, të cilin e dogjën në dalje të qytetit dhe nën kërcënimin e armës morën një automjet tjetër tip “Benz” të një qytetari të rastit duke u arratisur.
Policia ka rrethuar zonën dhe ka ngritur helikopterin për kontroll nga ajri.
“Rreth orës 14:10, jemi njoftuar se disa persona të paidentifikuar kanë vjedhur, nën kërcënimin e armës, një shumë parash në filialin e një banke të nivelit të dytë, në Koplik, Malësi e Madhe, dhe më pas janë larguar me një mjet tip “Volkswagen”, të cilin e kanë djegur në dalje të qytetit.
Personat, ende të paidentifikuar, pasi kanë djegur automjetin e tyre, kanë vjedhur nën kërcënimin e armës, një automjet tjetër tip “Benz” të një qytetari të rastit dhe janë larguar.
Shërbimet e Policisë janë vënë në ndjekje të autorëve. Në ndihmë të Policisë lokale janë nisur shërbimet e Drejtorisë Vendore të Policisë Shkodër dhe grupe të FNSH Shkodër.
Gjithashtu janë ngritur pika kontrolli, me qëllim identifikimin dhe kapjen e autorëve.
Grupi hetimor, nën drejtimin e Prokurorisë pranë Gjykatës së Rrethit Gjyqësor Shkodër, po punon për zbardhjen e ngjarjes dhe sqarimin e plotë të rrethanave të saj”, njofton policia.
