Nis zbatimi i kontratës së konçesionit i Triportit në Vlorë. Ky projekt do të realizohet nga një konsorcium i përberë prej 5 kompanish të cilët do të investojnë një vlerë prej 40 mln eurosh.
Kjo kontratë do të ketë një kohëzgjatje prej 10 vitesh.
Gara për projektimin, ndërtimin dhe mirëmbajtjen e Triportit në Vlorë u hap vitin e kaluar, teksa ministria e Infrastrukturës dhe Energjisë parashikonte një vlerë projekti prej 44.9 mln Euro.
Në dokumente përcaktohet se pagesa nga buxheti i shtetit do të fillojë pas ndërtimit të plotë dhe dorëzimit përfundimtar të objektit
Ky projekt parashikohet të ndërtohet 9 km në Veri-Lindje të qytetit të Vlorës dhe konkretisht në portin e peshkimit të këtij qyteti të quajtur “Triport.”
Aktualisht ky port shërben vetëm për peshkim ndërsa pas përfundimit të investimit nga koncesionari parashikohet ndërtimi i kalatave të reja që do të shërbejnë për përpunim të mallrave dhe transportin e pasagjerëve.
Në dokumentet e projektit theksohet se Triporti i Vlorës do të jetë edhe një pikë ankorimi i rëndësishëm për jahtet duke ndikuar pozitivisht në turizëm për të gjithë zonën e jugut.
