Qeveria shqiptare e ka të qartë që datë për konferencën e parë ndërqeveritare në qershor nuk do të ketë. Megjithatë, ministrja e Jashtme, Olta Xhaçka ka zhvilluar një takim me eurokomisionerin, Oliver Varhelyi.
Xhaçka thotë se i ka theksuar eurokomisionerit bindjen e Shqipërisë se dështimi për të mbajtur konferencën e parë këtë qershor do të ndikojë negativisht në besueshmërinë e BE-së.
“Takim i frytshëm me Komisionerin për Fqinjësinë dhe Zgjerimin në KE, Oliver Varhelyi në prag të takimit të Këshillit të Punëve Jashtme me Ministrat e Jashtëm të Ballkanit Perëndimor.
U dakordësuam që vendimi për konferencën e parë ndërqeveritare duhet të merret në qershor. Nënvizova bindjen e Shqipërisë se dështimi për të mbajtur konferencën e parë këtë qershor do të ndikojë negativisht në besueshmërinë e BE-së dhe situatën në Ballkanin Perëndimor”, thuhet në postim.
